Casa Amalia / Paraor de Tarna


Direición: Puerto de Tarna, 33997 - Tarna - Caso (Casu)
Teléfonu: 985 613 796



Recomendaciones: Fabada y Carne




Calidá: 3/5



Preciu: 20€




Comentarios: Na llende d'Asturies cola meseta pol puertu Tarna atopamos l'antiguu Paraor; famosu nel mundiu enteru pola so Fabada. En verdá nun soi muncho de dir a xintar fabada perende, por eso de que como la de casa en nengún llau, pero yera tan famosa y tanta xente de bon yantar que conozco que la recomendara qu'aprovechamos una rutuca de mediu día a les Cascaes del Tabayón pa dir a xintar ellí.
Prestome abondo'l llocal, porque ye como entrar n'otra dómina, y retroceder nel tiempu. Ye un chigre que tuvo dómines meyores pero remembrome a esgaya a la mio infancia.
Atendionos Amalia, una señonira de xestu focicón pero con una retranca mui asturiana que ta sollerte que nun dexes na nel platu y a traete más por si quies repetir.
De primeru, o Fabada o Sopa, nun hai más. Y claro, nun diba dir ellí pa tomar una sopa (que pidiola una mocina que venía con nós y taba bien bona). La Fabada inmensa, maraviosa, coles fabes tienres y l'espesor xustu. Perfecha. Nun voi dicir que ta meyor que la de mi ma o la moza pa que nun m'echen de casa, pero ehí taba la cosa. Repetí, y fice alcordanza del mio güelu con esa costume tan asturiana de facer un bocadiellu untando'l tocín na migaya'l pan cola morciel.la yal chorizu.
De segundu Amalia ofrecionos Xabalín, Corderu, Pitu Caleya, Picadiyu ya Trucha.
La mesa decatose pol Xabalín y yo pidí Picadiyu pa probar daqué distinto. A la fin, repetimos toos de too, quier dicir, el Xabalín desfacíase solu ensín cuchiellu. Venía acompangáu con unes pataques frites ya unos pimientucos, lo mesmo qu'el Picadiyu que picaba pero taba suavín.
Si hai que poner un "pero" foi a los postres, que tenien namás tarta de quesu, pero que nin yera casera, paez ser que l'arroz con llechi se-yos finara.
Vinu Cosecheru El Condao (con dos coyones), Agua, Café (dalgún/a tuvo de pidir manzaniel.la pola fartura) y dellos clines caseros perbonos que tomamos na barra d'abaxu (invitaos pola xente'l chigre), salionos por 21€.
Perbon sitiu pa fartar fabada y carne, con comida de perbona calidá y perbaratu. Si tas pela zona, vete.

2 comentarios:

Fartones dijo...

A pola Fabada!!!!

Fartones dijo...

güei hay que lo aprovechar lo de comentar :-)