Xornaes de les Cebolles Rellenes - Restaurante Urogallo

RESTAURANTE CERRADO



Direición: Carretera L'entregu - San Vicente, 7 - 33940 - L'Entregu
Teléfonu: 985 660 344


http://www.elurogallo.com/
Recomendaciones: Cebolles Rellenes y Callos


Calidá: 4/5



Preciu: 26€




Comentarios: Por mor de les Xornaes de les Cebolles Rellenes, averámonos al Restorán Urogallu, asiatiáu en L'Entregu. Restorán de bona fama y asoleyáu per Asturies. Conocíalu, pero nun iba dende cuantayá.

Tien unes vistes precioses a la parte d'atrás del Muséu la Minería (dafechu, dir al Muséu y dempués xintar n'él ye un plan perfeutu) y al Valle'l Nalón.

Cuando llegamos, la entrada pela zona'l bar taba pesllada, polo que tuvimos que guetar, casi a escures, l'entrada al restorán, qu'asemeya más a l'entrada a un hotel. Nun había naidie abaxu, polo que tuvimos que xubir al primer pisu fasta qu'atopamos el salón del restorán. Esos detallinos prestaba más cuidalos y tener dalguien abaxu pa guiate y acompañate'l salón.

Salón sobriu, típico de bodes, con meses redondes. Tábemos casi solos y había una cena con delles presones dixebraes por un biombu pa da-yos privacidá.

Perbona serviciu, mui atentu pero ensín molestar.



El Menú de les Xornes yera: Cebolles Rellenes + Callos + Postre. Pero diéronmos la opción de camudar cualesquier de los platos principales per: Sopa o Merluza a la Plancha o Ternera Gobernada. Yéramos 4, asina qu'hubo pa tolos gustos: tomamos toos Cebolles Rellenes, y ca ún elixió un platu distinto pa probar.

Les Cebolles Rellenes taben espectaculares. Suaves, bien cocinaes, con bon rellenu, con una salsina prestosa, bona presentación con pimientos y yema de güevu. Un platu perfeutu.

De los demás platos probé la Merluza a la Plancha, bona ración de Merluza, con un sabor perbono, suavina, bien fecha y fresquina. Los Callos taben espectaculares, cuantayá que nun probara unos tan bonos. Tienros, suavinos, despiezaos, con una salsina picantina pero ensín pasase ... casi superen a les Cebolles.

La Ternera Gobernada nun la probé, pero dixéronme que tenía bon tastu y que desfacíase namás tocala. La ración yera perbona tamién.

De Postres, venía col menú, un platu con un Frixuelu, una minicasadiella y un canutiellu. Yo quedé ablucáu col canutiellu, que soi mui d'ellos. Cruxiente, col rellenu persuavín ... Mui ricu.



La parte mala'l menú yera ensín dubia'l vinu: Prensa Real, que pue tar bien pa un menú del día, pero non pa unes Xornaes. Tampoco nos ufiertaron pagar un plus p'ameyorar la botella.

Dempués del vinu, colos cafés, trayéronmos un chupitín d'anís de guindes, qu'esi sí, taba perrrico.

Quedáronme ganes de tornar a xintar de carta. Pero prestáronme enforma estes xornaes.



1 comentarios:

David López Castañón dijo...

Añadimos información que nos gusta nada.

http://www.infoasturies.net/index.php/economia/item/2955-conceyu-abiertu-por-llangr%C3%A9u-y-samart%C3%ADn-piden-una-soluci%C3%B3n-digna-pa-palacio-de-las-nieves-y-urogallo#.Uw9icfl5PJU

Piden soluciones pa los nueve trabayadores despedíos.

Dende Conceyu Abiertu despliquen que "nueve trabayadores de les instalaciones hosteleres "Palacio de las Nieves" y "Urogallo", dambos del mesmu grupu empresarial, foron despedíos de los sos puestos de trabayu. El despíu afeuta a la mayoría de la plantilla y foi efeutuáu vía carta. Amás el grupo empresarial debe-yos a estes persones dellos pagos, que trata de nun pagar escudándose en mentires y más mentires".

Poro, Conceyu Abiertu por Llangréu y Samartín del Rei Aurelio "unviamos la nuesa solidaridá a les persones despedíes y denunciamos l'actitú falsa y tramposa del grupo empresarial "Urogallo" na operación. Munches de les persones que foron despedíes lleven munchos años trabayando n'una d'estes instalaciones hosteleres y camentamos que ye llamentable y pocu éticu que se trate asina a persones que lo dieron too na so vida por esti grupu y estos establecimientos".

Nesi sen, dende dambos Conceyos Abiertos piden "la realmisión de los trabayadores despedíos pues nun hai evidencies suficientes pa llevar a cabo esti despíu masivu y tamién desiximos que se-yos abone a estes persones los pagos que-yos deben. Per otru llau queremos pidir más voluntá ya implicación a los gobiernos llocales de Samartín del Rei Aurelio y Llangréu, dambos del PSOE pa nun permitir esta situación. Tamién pidimos la mediación y compromisu de Graciano Torre, conseyeru supuestamente ocupáu d'asuntos d'emplegu y de tipu llaboral".