Tastia d’Aguardiente de Sidra - Revista La Sidra


L'Aguardiente de Sidra ye ún de los grandes escaecíos na Gastronomía Asturiana. Ye una pena que s'esnembre tantu una bébora tan asturiano, y, como vais poder ver dempués de lleer esta crónica, con tanta calidá.


Lo normal en cualesquier restorán ye, finada la comida, tomase un "dixestivu". Dientro de la ufierta vamos atopar delles Xinebres pa faenos un gintonic, dellos Güisquis de distintes calidaes y dellos oruxos o llicores industriales de permala calidá.

Y n'Asturies tenemos productu de perbona calidá pa rematar les comíes. Siempres encamento una Sidra de Xelu pa maridar col postre y un Aguardiente de Sidra (vais afayar nel intre el mio favoritu) como dixestivu.

Axuntamos un grupu de persones nel Llar la Revista La Sidra pa realizar la preba, cola dirección de Juan Zurriarrain (Químicu, Asesor técnicu enolóxicu nel País Vascu), Donato Xuaquín Villoria Tablado (espertu probador de sidra) y Manuel G. Busto (espertu probador de sidra).

La idea yera probar Aguardientes de sidra de distintes denominaciones d'orixe: Asturies, País Vasco y Normandía. Apuntar que la primer DO d'aguardiente d'Europa algamola Los Serrano (Ribeseya), datu completamente desconocíu n'Asturies.


Empezamos col Orujo Destilado de Mazana de Los Serranos (Asturies). Destilao de 45º. Ye oruxu, non aguardiente, fecho de la magaya la mazana. Los Serranos fueron de los primeros productores d'oruxu y aguardiente d'Asturies y aínda siguen trabayando pa la zona Ribeseya. Fundadores de la mítica "Anís l'Asturiana", lleven faciendo oruxos y llicores n'Asturies dende finales del s.XIX.


Siguimos con L'Alquitara del Obispo, de Casería San Juan del Obispo (Asturies). Esto ya son palabres mayores. Una maravía esta alquitara. De color cristalín. Arume frutal, a manzana ensin golor fuerte. Y 41º de sabor seco pero afrutáu na boca, con un equilibriu y llargor esceicional.

Entamamos colos 3 Calvados, de la rexón de Normandía. Carauterísticu pol so color doráu y avieyamientu con barriques de madera.


Calvados La Fontaine. Equí nótase la baxada nivel cola Alquitara. Sobremanera nesi picor en nariz qu'amuesa la falta d'integración del alcohol. Entrada suave na boca, sabor a madera pero rasca. Tamién hai picante na boca. 40º d'alcohol pa un Calvados simple ya pocu integráu.


Calvados Fine Papidoux. Ún de los favoritos de la preba. Arumes de compota mazana y con un sabor integráu, muncho más finu, ensin rascar al final. Calvados perpeligrosu porque son 40º qu'entren solos ensin enterate.


Calvados Sylvain, el peor de los 3 Calvados a mi gustu. Coméntase que quiciabes tenga dalgo d'azucar. Con un golor perbonu pero que desapaez na boca. Otros 40º.


Volvemos al aguardiente asturianu de la manu de Los Serranos, esta vegada col famosu Marc de Asturias, con un golor frutal mui arumáticu, con un sabor intensu y llargor en boca. Bonísimu. 40º.


Entamamos con la parte vasca de la preba. Señorío de Belmont Saizar, 40% de maraviyosu golor, anque nun aguanta'l tipu na boca, onde resulta más dulce. Quiciabes tien el meyor golor de tolos que probamos.


Camudamos otra vegada a la Casería San Juan del Obispo cola so xoya la corona. Salvador del Obispu Aneyu. Una presentación de 10, col estuche de cartón. Una botella perguapa, con otru corchu (de silicona, eso sí), pa dempués d'abierto l'aguardiente. 9 años pa facer esti aguardiente. Color preciosu ámbare. Arumes tostaos y a mazanes. Y sabor integráu ya equilibráu. Perfeutu na boca. 42,5º, paez que non, pero esos 2,5º se noten, quiciabes los 40º seríen tovía meyor. El mio favoritu de la nueche.


Finamos con otra xoya, Zapiain Sagardoz, que foi que más gustó a los probadores. Golor fuerte, pero integráu, y un llixeru regustu a carambelu en boca al final. 40º  con un dulzor finu que lo faen más agradable na boca que sos predecesores.


Perinteresante exerciciu prebando 10 aguardientes con distintes maneres de tratar el productu, distintes xeres de facelo y distintes mazanes p'algamalo. Un placer deprender de xente que cuida tanto'l productu, aprendiendo a apreciar munches más coses d'un bon caldu y a ver más allá de lo típicu. Pasamos perbona tarde en perbona compañía.


0 comentarios: